முருகா

முருகா உன்றன் பாதம்
முகமே பதித்து வேண்டுகின்றேன்!
அருவாய் உருவாய் என்றும்
அருளி என்னை ஆட்கொள்வாய்!
தருவாய் பாடல் நிறைவாய்
தகைமை மின்ன எழுதிடவே!
கருத்தாய் வந்து கருணைக்
கடலே! கண்ணைத் திறவாயே!

பல்லோர் வணங்கும் கந்தா!
பசுமை வீசும் வேலவனே!
நல்லோர் நெறியைக் காட்டி
நன்மை யாவும் தருவாயே!
வல்ல திறனை யூட்டி
வளமே காணச் செய்வாயே!
வெல்லும் வழிகள் காட்டி
வியக்கும் வாழ்வை யருள்வாயே!

அன்னை தந்தை என்றே
அன்பாம் இருவர் நீயானாய்!
முன்னைப் பிறப்பின் வினையை
முற்றும் அகற்றித் துணையானாய்!!
கன்னல் தமிழின் முதல்வா!
காப்பாய் மொழியை வளம்பெறவே!
வண்ண அழகா! அமுதா!
மணக்கும் கவிகள் தருவாயே!

________________