மழையோடு விளையாடி

நண்பர் ஒன்றாய்க் கூடி
நல்ல பகலை வரவேற்க,
விண்ணில் முகிலின் கூட்டம்
விடிந்த பொழுதை இருளாக்க,
அண்டம் அதிரும் வண்ணம்
அங்கே சத்தம் கேட்டதுவே!
கண்ணைக் கூசும் மின்னல்
கதியில் தோன்றி ஓடியதே!

மண்ணில் மழையும் பொழிய
மகிழ்ந்து சிறுவர் சத்தமிட
இன்பம் கொண்ட உழவர்
ஈடில் மகிழ்வைக் கொண்டனரே!
பண்கள் பாடி யாடிப்
பட்டுச் சிறுவர் சேர்ந்திட்டார்!
எண்ணம் எல்லாம் ஒன்றாய்
எல்லோர் மனங்கள் குளிர்ந்தனவே!

வாடி இருந்த பயிர்கள்
வளமாய்ச் செழிக்கக் கண்டோமே!
ஓடி வடிந்த வெள்ளம்
உள்ளம் குளிர வைத்ததுவே!
நாடிச் சென்றே ஆற்றை
நன்றாய் நிரம்பச் செய்ததுவே!
கோடி நன்மை நல்கும்
கோல மழையைப் போற்றுகிறேன்!

________________